پیو۔ پنجابی کہانی

پیو

از

ٹیپو سلمان مخدوم

اکّو اک تے پیو سی میرا، تے او وی مر گیا شوہدا۔ اونوں ہوری لگدا سی او خدا دا نائب نئی مختارِ عام سی۔ سب کُج پیدا کرڻ آلا۔ بےبے چ میرا بی پا کہ مینوں پیدا کیتا۔ آپڻے کلیجے تے شراب دے مینہ ورسا کے سرطان پیدا کیتا تے ساری عمر پُٹھا سِدھا ہو ہو کہ دولت تے عزت پیدا کرڻ دی کوشِشاں کردا ریا۔

میرا پیو جدوں مویا تے اوہ پنجاہ دے پیٹے چ سی تے میں ہُڻ اَسّی توں اُتے آں۔ حیاتی دا پھیر ایہو جیا ہویا کہ میں ہُڻ آپڻے پیو دی عمر دے لوکاں نوں پُتر بلانداں ہاں۔

میرا پیو اک محنتی تے شریف بندہ سی۔ شراب تے شرافت اِچ نہ تے کوئی میل اے تے نہ ای کوئی چِھنج۔ میرا پیو شرابی ہو کے وی شریف ایس لئی سی کہ اونے کدی وی کسی دا حق کھو کہ فیدا لیڻ دی کوشش نئی سی کیتی۔ او اِک وڈی بین الاقوامی کمپڻی اِچ چنگی نوکری تے سی۔ حیاتی چ او جو وی حاصل کرڻا چاہندا سی، نئی سی کر پا ریا۔ ایس لئی ہر ویلے بے سکون جیا ریہندا سی۔ ہر ویلے ہور زیادہ دی کِھچ پِچھے دوڑدا۔ سوہڻی وہٹی، رئیس سوہرے، چنگے پیسیاں آلی نوکری، تگڑا تے سیاڻا پتر، مہنڳا ڳھر، وڈا ناں۔ سُفڻے اونے ڈھیر ای پالے ہوئے سڻ۔ پر حیاتی دی لمّی دوڑ جِتّڻ لئی اے کافی نئی سڻ۔ ہور وی بتھیرے سڻ۔ جیویں اے وی اودا اک سُفڻا سی کہ آپڻے پُتر نوں باروں پڑھا کہ اودے لئی اینا کُج چھڈ کے جائے کہ ساری حیاتی اونوں کسے شہ دی لوڑ نہ پئے۔ تے آپڻے اے سُفڻے پورے کرڻ واسطے او دن رات کھوتے ونگر کم کردا۔

وہٹی اودی سوہڻی سی پر سوہرے امیر نئی سڻ۔ نوکری چنگی سی پر آمدڻ بوتی نئی سی۔ ڳھر آپڻا سی پر مہنگا آلا نئی سی۔

ماڑے ڳھر توں سی ایس لئی نوکری دے دوران ای پڑھدا ریا۔ تلیم پوری نئی سی ایس لئی نوکری ماڑی لبھی۔ سارا دن کم کرڻا پیندا سی ایس لئی تلیم دیر نال مُکّی۔ ویاہ دے ویلے نوکری ماڑی سی ایس لئی سوہرے تگڑے نئی سڻ ملے۔ جڻاں یونیورسٹیاں چوں امیراں دے مُنڈے ڈگریاں لے کہ پنجی وریاں دے مینیجر لگ جاندے نیں، اوناں یونیورسٹیاں چوں ڈگری لیندے لیندے میرا پیو چالی ٹَپ گیا۔ پندرہ وریاں دی اے دُوری اودی جاڻ رول گئی۔

کارپوریٹ دی دڻیا دی انتظامی تھاں تے اپڑ کہ اوس تے اے راز کُھلیا کہ ایتھے اُڈڻ لئی تے پنکھ ای ہور چاہیدے سڻ۔ اودی عمر دے لوک پندرہ وریاں تو کمپڻی دی اُتلی منزلاں چ سڻ نے اوناں دے آپس اِچ تے دوسری کمپڻیاں دے افسراں نال ایہو جئے تعلق بڻ چکے سڻ جیڑے کسی نوے بندے نوں وچ وڑن نئی سن دیندے۔ اونوں انج لگڻ لگ پیا جسراں اودے چار چفیرے شیشے دیاں کنداں نیں۔ پہلاں پہلاں تے اونے بڑی ٹکراں ماریاں فیر جدوں اونوں یقین ہو گیا کہ اے شیشے اوستوں بوتے تگڑے نیں تے اونے سچائی توں نسڻا شروع کر دتا۔ ساری شام شراب پِیندا رَیندا۔ اے گل او کدی سمجھ ای نہ سکیا کہ بندے دی ترقی دیاں حداں اودی جنم بھومی دے آلے دوالے ای ریندیاں نے۔

شیشے دے تابوت دے اندروں یا گھر بڻ سکدا سی یا مُنڈا پڑھن ولیت جا سکدا سی۔ ڳھر بڻ گیا تے باقی سفڻے اودے وچ دفن ہوڻ لگ پئے۔ جام وادو ہوڻ لگ پئے۔ یونیورسٹی تے سرطان دے ہسپتالاں دے میرے چکر اگے پچھے ای شروع ہوے۔ پہلاں پہل تے پیو نوں مہینے وچ اک ادھ وار ہی ہسپتال لِجاندا۔ فیر کُج ای وریاں چ ہر دوجے دیہاڑے لجان لگ پیا۔ تے فیر او ہسپتال داخل ای ہو گیا۔ میں اودے نال ہسپتال ای رہ پیا۔ تیجے دیہاڑے پیو نے چھٹیاں بارے پچھیا نے میں دس دتا بئی میں نوکری چھڈ دتی اے۔ اونے ایہو جئیاں ہونق نظراں نال میرے ول ویکھیا کہ میں گھابر ای گیا۔

“ہڻ اینی کوئی اُچی نوکری وی نئی سی ابو۔“

میں گڑبڑا کہ اونوں تسلی دیڻ دی کوشش کیتی۔ گل کوئی اینی غلط وی نئی سی۔ او بولیا تے کُج نا، بس انج سِر سُٹیا کہ اک واری تے مینوں لگیا بئی نکل گئی اودی جاڻ۔ پر او جیوندا سی۔ بس ایس شرمندگی نال مرنا چاہندا سی کہ آپڻے پُتر نوں ولایتوں پڑھا کہ ودھیا نوکری نئی سی لگوا سکیا۔

ہسپتال اِچ لنگیا او ویلا عجیب و غریب ثابت ہویا۔

کُج ای دناں بعد اونے آپڻے سُفڻیاں دیا گلاں کرنی شروع کر دتیاں۔ اے عجیب جئی گل سی کیوں جے ایس توں پہلاں او میرے نال ہمیشہ زندگی دے مقاصد تے اوناں دے حصول لئی ضروری منصوبہ بندیاں دیاں گلاں کردا ہوندا سی۔ ہُڻ او مرڻ لگا سی تے اونے مینوں دسیا کہ او زندگی نوں کنج ویکھدا سی۔ کیڑے کیڑے سفڻے سڻ جیڑے کلیجے نوں لا کہ او قبر وچ جا ریا سی۔

مینوں پہلی وار پتہ لگیا کہ اج تیکر میرا پیو جو زندگی گزاردا ریا سی او اصل اچ میرے روشن مستقبل لئی کٹی گئی اک سزا سی۔ اودی زندگی تے اوس ویلے شروع ہوڻی سی جدوں اونے سارے ضروری کم نبیڑ کے ریٹائر ہوڻا سی۔ اونے مینوں دسیا کہ اونے گاڻا نہ سکھیا کیوں جے ترقی دی جلدی اچ او وقت ای نہ کڈ سکیا۔ اونوں دنیا پھرڻ دا شوق سی پر پیسے جوڑڻ دے چکر وچ او ویلا ٹپاندا ریا۔ مینوں ایہی سمجھ آئی کہ اودی زندگی اودے بڑھاپے نے جمڻی سی پر ہڻ بڑھاپا ای اونوں دغا دے ریا سی۔

میرا بڈھا پیو میرے سامڻے زندگی گزارے بڻا ای مردا جا ریا سی۔

اک دڻ میرے پیو نے میرے کولوں وعدہ لیا کہ میں اودے نقش قدم تے چلدیاں اودے سفڻے پورے کراں گا۔ یعنی وڈا گھر، وڈی نوکری، وغیرہ۔ اوس رات میں ہسپتال دی چھت تے چڑھ کہ بوت رویا سی۔

اودے چالیسویں دے بعد میں اودی قبر تے صرف اوسی ویلے جاندی جدوں آپڻا کوئی نہ کوئی سفڻا پورا کر لیندا۔ ایس واری پسند دی شادی۔ ہڻ افریقہ دی سیر۔ ہڻ مصوری سکھ کہ۔ ہڻ چنگی نوکری چھڈ کے مرضی دی ماڑی نوکری کر کے۔ ہڻ۔۔۔۔ہڻ۔۔۔۔ہڻ۔۔۔۔۔۔۔

میں آپڻی اسّی سالہ زندگی اچ اوستوں ادے پیسے وی نئی کما سکیا جنے میرے پیو نے پچونجہ وریاں چ جوڑ لئے سڻ۔ پر میرے کول آپڻے بچیاں نوں دسڻ لئی دل دے پھپھولے نئی بلکہ مزیدار تے دلچسپ تجربات دا اک ڈھیر اے۔ ہڻ جدوں میں آپڻے بچیاں نوں آپڻے نقش قدم تے چلڻ دا کہڻا آں تے او آپڻے موڈھیاں تے بوجھ نئی بلکہ چھاتیاں اچ ولولہ محسوس کردے نیں۔ مینوں انج لگدا اے بئی زندگی اک بڑا مزیدار سفڻا اے۔