فریج وچ پیا ٹماٹر
لیکھک
مخدوم ٹیپو سلمان
میں کسے نوں دسدا نہیں۔ جے دس دتا تے ایہناں مینوں رسے پا کے پاگلاں
دے ڈاکٹر کول لے جانا اے جنہیں دوائیاں کھوا کھوا کے میری مت مار چھڈنی اے۔ ڈاکٹر جو پاگلاں
دا ہویا۔
ایسے لئی میں ایہناں نوں دسدا نہیں بئی میں ٹھیک ہو گیا واں۔ ایہہ سارے پاگل جو ہین۔ ایہناں
نوں پتہ لگ گیا تے ایہناں نے مینوں فیر پاگل کر چھڈنا اے۔
مینوں پہلاں ای لگن لگ پیا سی بئی یہناں
نوں کجھ شک جیہا پے گیا اے۔ کئی واری انج ہوندا کہ دو تن جی کھسر پھسر پئے کردے ہوندے، تے مینوں ویکھدے
ای چپ چاں۔ اتوں جے میں غور نال ویکھدا
تے اگوں اوہ وی مینوں غور غور نال ویکھن لگ پیندے۔
