Plastic Di Tutti Gaddi-Punjabi

 پلاسٹک دی ٹٹی گڈی

لیکھک

ٹیپو سلمان مخدوم

پلاسٹک دی ٹٹی گڈی، دھپّے سڑدی رہندی اے۔ پشلے ٹیر وچھوڑ گئے نیں۔ نہ کوئی چکدا اے، نہ کوئی سٹدا اے۔   صاف وی نئیں کردے تے نہ ای ردی آلے نوں ویچدے نیں۔

نویں نویں آئی سی تے لشکارے ماردی سی۔ ہر بال بالڑی دے اشارے تے اینج بھجدی سی جیویں جی-ایم دی گھینٹی تے اؤپریشنل منیجر۔

ہن تے پرائیویٹ کمپنی دی "رائیٹ سائیزڈ" امپلوئی لگدی اے، جہنوں پینشن دی وی اڈیک نئیں ہوندی۔

کدی بجلی چلے جائے، جستوں بالاں نوں مجبوراً سکریناں چھڈکے باہر کھیڈنا پوے تے اینج دسدی اے جیویں عُمراں لنگھی سوانی گھر رشتہ آیا ہووے۔ ڈھڈّ تھلوں اٹھدیاں لوڑاں، چھاتی تھلوں اٹھدیاں ہوکاں تے سروں لیہندے پشلے دھتکاریاں دے چیتے جویں ایس تیویں دے ہوٹھاں اتے امیداں بھری اداس تے ڈری ڈری مسکان لے کے آندے نیں، اؤسے طرہاں مسکاندی جاپدی اے ایہہ نیلی گڈی۔

ٹٹے ٹیراں نال وی کسے نوں نہ نئیں کردی۔ خورے شکر ای کردی ہووے کہ اوہدی وی کسے نوں لوڑ پئی اے۔

خورے میرے وانگ ایہنوں وی آپنی ہوند بالاں وچّ قید دسدی ہووے؟