فریج وچ پیا ٹماٹر. Punjabi Story

فریج  وچ  پیا  ٹماٹر

لیکھک

مخدوم  ٹیپو  سلمان

میں  کسے  نوں  دسدا  نہیں۔  جے  دس  دتا  تے  ایہناں  مینوں  رسے  پا  کے  پاگلاں  دے  ڈاکٹر  کول  لے  جانا  اے  جنہیں  دوائیاں  کھوا  کھوا  کے  میری  مت  مار  چھڈنی  اے۔  ڈاکٹر  جو  پاگلاں  دا  ہویا۔

ایسے  لئی  میں  ایہناں  نوں  دسدا  نہیں  بئی  میں  ٹھیک  ہو  گیا  واں۔  ایہہ  سارے  پاگل  جو  ہین۔  ایہناں  نوں  پتہ  لگ  گیا  تے  ایہناں  نے  مینوں  فیر  پاگل  کر  چھڈنا  اے۔

مینوں  پہلاں  ای  لگن  لگ  پیا  سی  بئی    یہناں  نوں  کجھ  شک  جیہا  پے  گیا  اے۔  کئی  واری  انج  ہوندا  کہ  دو  تن  جی  کھسر  پھسر  پئے  کردے  ہوندے،  تے  مینوں  ویکھدے  ای  چپ  چاں۔  اتوں  جے  میں  غور  نال  ویکھدا  تے  اگوں  اوہ  وی  مینوں  غور  غور  نال  ویکھن  لگ  پیندے۔

کل  تاں  حد  ای  ہو  گئی۔  میں  فریج  وچ  پئے  ٹماٹر  نال  گلاں  پیا  کردا  ساں  ،  تے  اتوں  ابا  جی  آ  گئے۔  پہلاں  تے  مینوں  اک  دو  واری  ارام  نال  پچھیا  بئی  میں  کدے  نال  گلاں  پیا  کرداں  ساں۔  خورے  کدھوں  دے  میرے  پچھے  کھلو  کے  میریاں  تے  ٹماٹر  دیاں  گلاں  پئے  سندے  سن۔  جدوں  میں  کجھ  نہ  دسیا  تے  میرے  موڈھے  پھڑ  کے  زور  زور  دی  مینوں  جھٹکے  مارن  لگ  پئے،  اتوں  چیکن  لگ  پئے،  دس،  دس،  کدے  نال  گلاں  پیا  کرنا  ساں؟ 

میں  فیر  وی  کجھ  نہ  دسیا۔  ہن  میں  بیلیاں  نال  کیتیاں  گندیاں  گلاں  کسطرحاں  دسدا  ابّے  نوں؟  میں  تے  ٹماٹر  نوں  پیا  دسدا  ساں  کہ  میرا  موتر    وی  ہن  میرے  کہن  وچ  نہیں  رہیا۔  دھار  میں  سجے  پاسے  نوں  ماراں  تے  جاندی  کھبے  پاسے  نوں  اے۔  میں  اک  دن  اوہنوں  تراہیا  وی  سی،  پر  اجے  میں  چھترول  کرنا  ای  پیا  ساں  تے  لوکی  زور  زور  دی  بوہا  پٹن  لگ  پئے۔    میں  گھابر  کے  چپ  کر  گیا  کہ  فیر  پچھن  گے  کدے    اتے  پیا  چیکنا  ساں؟  ہن  کیہ  دساں  گا  میں  ایہناں  پاگلاں  نوں؟  بس  اوس  دن  دا  تے  موتر  وی  میرا  پیو  بنیا  کھلوتا  اے۔  کدھے  ایدھر  تے  کدھے  اودھر،  کدھے  ایدھر  تے  کدھے  اودھر۔ 

میں  ٹماٹر  نوں  ایہہ  وی  دسیا  سی  بئی  کسطرحاں  اک  دن  میرے  ہتھ  نے  انج  ای  مینوں  کنا  ستایا  سی۔  ٹکر  کھاندے  کھاندے  میں  پانی  پین  لئی  گلاس  پھڑن  لگا  تے  اوہنے  کانٹا  پھڑ  لیا۔  جی  تے  میرا  کیتا  اک  واری  کٹ  سٹاں  حرامدے  نوں،  پر  سارے  جی  نال  ای  بیٹھے  کھانا  پئے  کھاندے  سن۔  اوس  ویلے  تے  میں  اوہنوں  جھڑک  وی  نہیں  ساں  سکدا  کیونجے  سارے  پاگلاں  نے  فیر  کٹھے  ہو  جانا  سی  کہ  کدے  نال  گلاں  پیا  کرنا  ایں؟  سالا  میری  تے  سنے  ای  کوئی  نہ۔  میں  تے  ایس  جوگا  وی  نہ  رہ  گیا  بئی  ہتھ  کانٹے  توں  چھک  کے  مڑ  ٹکر  ای  کھان  لگ  پیندا۔  ہتھ  اوتھے  ای  جُو  جم  گیا  سی۔  کجھ  چر  ہتھ  اوتھے  ای  جمیا  رہیا  تے  سبھ  میرے  ول  ویکھن  لگ  پئے۔  سِین  اوس  ویلے  کجھ  ایس  طرحاں  دا  بن  گیا  سی  کہ  میں  وی  فیر  اوہناں  ول  بٹر  بٹر  ویکھن  لگ  پیا۔  واہوا  ای  چر  ہو  گیا  ایسطرحاں  اک  دوجے  نوں  ویکھدیاں  جدوں  اچانچک  مینوں  جا  پیا  بئی  ہتھ  ٹھیک  ہو  گیا  سی۔  میں  چپ  کر  کے  ہتھ  کانٹے  توں  چھک  کے  ٹکر  کھان  لگ  پیا۔  اکھاں  میں  اپنی  پلیٹ  وچ  گڈ  لئیاں  تے  ساریاں  دِیاں  اپنے  تے  گڈیاں  اکھاں  جھٹکن  لئی  زور  زور  دے  جھٹکے  مار مار  کے  برکیاں  چبن  لگ  پیا۔ 

اگوں  ٹماٹر  وچارہ  اپنی  ہوند  دے  مسئلیاں  توں  پریشان  سی۔  اوہ  مینوں  پیا  دسدا  سی  کہ  تِن  دناں  تو  اوہ  فریج  وچ  پیا  سی  تے  اوہدا  جثہ  نرم  پے  گیا  سی۔  ہن  اوہنے  کوڑے  وچ  ای  جانا  سی۔  کہندا  سی  نہ  اوہنے  کیڑے  دا  ٹڈھ  بھریا  نہ  پکھیرو  دا  تے  نہ  ہی  ہن  بندے  دا۔  اوہدی  جندڑی  دا  مقصد  کیہ  سی؟  ایہہ  گل  سن  کے  سچی  مینوں  بڑا  رونا  آیا۔  پر  میں  ڈک  گیا۔  میں  سوچیا  جے  میں  رو  پیا  تے  ٹماٹر  نے  وی  رون  لگ  پینا  اے،  تے  اوہدا  رونا  نہیں  سی  ویکھیا  جانا  میرے  کولوں۔  میں  ٹماٹر  نوں  کتکتاریاں  کر  کے  ہسانا  ای  پیاں  ساں  جدوں  پچھوں  ابے  نے  میری  دھون  پھڑ  لئی  سی۔

تے  اج  سویر  فیر  سارے  دے  سارے  جی  میرے  دوالے  ہو  کھلوتے۔  میں  اوہناں  نوں  تے  کجھ  وی  نہیں  ساں  پیا  کہندا۔  میں  تے  اپنے  ٹڈھ  نال  پیا  لڑدا  ساں۔  اوہ  گاجر  دا  حلوہ  ای  نہیں  سی  پیا  ہضم  کردا۔  ادھی  راتیں  پہلاں  تے  مینوں  سُتے  پئے  نوں  اٹھ  جگایا۔  میں  کروٹ  لے  لئی  تے  سگوں  رون  لگ  پیا۔  کہن  لگا  میں  اکلا  آں،  مینو  ڈر  پیا  اوندا  اے۔  مینوں  ترس  آ  گیا۔  فریج  وچ  حلوہ  پیا  ویکھ  کے  نیانیاں  وانگوں  کلپن  لگ  پیا  بئی  میں  ایہو  لینا  اے۔  میں  اوسے  ویلے  آکھ  دتا  سی  بئی  میں  ایس  ویلے  کوئی  گرم  شرم  نہیں  اُو  کرنا۔  اگے  ای  اکھاں  نوں  تیرے  ڈر  دا  واسطہ  دے  کے  اوکھت  نال  کھُلایا  اے،  اوہ  تے  گھڑی  مڑی  بند  ہون  نوں  پھردیاں  نیں۔  اوس  ویلے  تے  حلوہ  ویکھ  کے  چھالاں  پیا  ماردا  سی  بئی  میرا  ملن  کرا  دے،  میں  ایہدے  نال  ای  جپھی  پا  کے  سونا  اے۔  جد  میں  سویرے  اٹھیا  تے  پٹ  سیاپا  پایا  ہویا  سی۔  کہندا  سی  ایس  حلوے  نال  میری  نہیں  اے  نبھدی،  کڈھو  ایہنوں  ایتھوں۔  فیر  میں  وی  اڑ  گیا۔  میں  کہیا  جو  وی  اے  جسراں  وی  اے،  ہن  نبھا۔  ایسے  اوئے  توئے  توں  گل  ودھدی  ودھدی  ودھ  گئی  تے  اوہنے  مینوں  گالھ  کڈھ  ماری۔  مینوں  وی  فیر  تپ  چڑھنی  ای  سی۔  میں  وی  رکھ  کے  دو  تن  دپھے  لا  دتے۔  تے  نال  ای  سارے  چھالاں  ماردے  میرے  تے  چڑھ  دوڑے  تے  پھڑ  کے  مینوں  ایس  کمرے  وچ  ڈک  دتا۔

میں  چپ  کر  کے  پھڑیچا  گیا  تے  ارام  نال  آ  کے  کمرے  وچ  بہہ  گیا۔  بوہے  نوں  تالا  ماردے  وی  میں  کجھ  نہ  کیتا۔  میں  اوہناں  دیاں  گلاں  سن  لئیاں  سن۔  کہندے  پئے  سن  ایہہ  تے  پورا  ای  پاگل  ہو  چلا  اے،  ایہنوں  پاگل  خانے  داخل  کرادیئے۔  اوہ  تے  بے  بے  نے  رولا  پا  دتا  تے  مینوں  ایتھے  بند  کر  گئے۔  جے  میں  کوئی  چیک  چہاڑا  پاندا  یاں  کھچ  دھروک  کردا  تے  لے  جاندے  مینوں  پاگل  خانے۔

دُپہرے  آئے  سن  جدوں  مینوں  پانی  ٹکر  دین  تے  پچھدے  سن۔  کیہ  گل  اے؟  کدے  نال  گلاں  کرنا  ایں؟  کیہ  لگدا  اے؟  میں  کجھ  نہیں  دسیا۔  پاگل  جیہے۔  پر  میں  ساریاں  گلاں  دادے  دی  پھوٹو  نوں  دس  دتیاں  سن۔  اوہ  اگوں  ہسدی  سی۔  کہندی  سی  توں  خامخاہ  فکر  نہ  کریا  کر۔  ٹکر  تے  رب  سبھ  نوں  دیندا  اے۔  پر  مینوں  پتہ  لگ  گیا  اے  ایہہ  سبھ  جوٹھ  اے۔  رب  شب  کوئی  نہیں  ہوندا۔  تے  ٹکر  وی  کوئی  نہیں  دیندا۔  ٹکر  آپے  کھو  کے  لینی  پیندی  اے۔  تے  جیہنوں  کھوندے  رونا  اوندا  ہووے  اوہ  گندے  آنڈے  ورگا  ہوندا  اے۔  ابا  کہندا  اے  مینوں  گندا  آنڈا۔  جد  میں  دادے  دی  پھوٹو  نوں  دسیا  تے  اوہ  رون  لگ  پئی۔  مینوں  بہت  پیار  کرے  تے  نالے  آکھے  توں  تے  شہزادہ  ایں،  ہیرا  ایں  تے  نال  نال  روندی  وی  جائے۔  اوہنوں  ایسراں  روندیاں  ویکھ  کے  مینوں  وی  بہت  رونا  آیا،  پر  میں  رویا  کوئی  نہ۔  فیر  باہروں  واجاں  آنیاں  سن،  رونا  کیوں  ایں؟